Albisteak
Uztaileko kultura-programazioa
2018-07-03 | iruzkinak: 0 | Lasarte-Oriako udala
Maite Iglesias kulturako zinegotziak eta Juantxi Ugarte kultur teknikariak uztaileko agenda kulturala aurkeztu dute.
Kultura-programazioa kalera tokialdatuko da. Aire libreko zinema, kale antzerkia eta dantza. Santa Ana egunaren jiran, Lasarte-Orian tradiziozkoak diren artisau-azoka eta parodia izango ditugu.
Udako Zinemak bi film proiektatuko ditu Okendo plazan 22:15ean: uztailaren 5ean SING STREET ikusi ahalko dugu, eta 19an LA TORTUGA ROJA. Euria ari badu, proiekzioa Elizatze plazara tokialdatuko da.
Kale-antzerkian, hiru dira Okendo plazan programatu diren emanaldiak. Uztailaren 6an, 19:00etan, Hortzmuga taldeak Jule obra eskainiko du. Hilaren 12an, ordu berean eta leku berean, Ganso&Cia konpainiak Bebo Royal antzeztuko du, eta uztailaren 13an, 18:00etan, Eibade taldeak Txapela Buruan eta Dantza Munduan. Hiru antzezlanek daukate Eusko Jaurlaritzaren “Kale Antzerkia Bultzatuz” programaren finantzazioa.
Uztailaren 20an, Okendo plazak 19:00etan dantza eta antzerkiko emanaldi bat eskainiko du Hika Teatroaren eta Oinkari dantza-taldearen eskutik, Sagartu izenekoa.
