Albisteak
San Pedro jaiak hemen dira!!!
2014-06-27 | iruzkinak: 0 | Lasarte-Oriako udala | Kultura eta Jaiak
Hiru, bi, bat,...Txispun! Hasi dira aurtengo San Pedro jaiak! Hurrengo lau egunetan Lasarte-Oria festetan murgilduta egongo da eta Udalak guztioi ondo pasatzera dei egin nahi dizue eta zenbait ohar gogorarazi nahi ditu:
Sexuen elkarbizitzarako emakumeen zentroa:
Lasarte-Oriako Emakume zentroak eta sexu informazio eta aholkularitza bulegoak jaima informatiboa jarriko du okendo plazan 19.00etan, txupinazo unean, eskaintzen dituen zerbitzuak helarazteko. Alde batetik sexu bulegoa bera plazaratuko da eta bestetik sexu informazioa eta kondoiak banatuko dira jai berdintasunezko, arduratsu eta ludikoak bultzatzeko.
“Gaur gauen beldurrik gabe egin dantza gelditu gabe”
Alkatearen agurra:
Guzti-guztionak.
Ume buruhandizale bihurriona
eta dultzemeneotan aiton-amona
nekaezinona.
Gaueko izarrak eta eguneko makarrak
soka luzez lotzen dutenona eta
baita zetazko hari finez lehenengo
laztana josten dutenona ere. Etxezulo
damutuenona. Errege-erregina ez
direnona, garbi, ezta?
Gazteona, noski. Barne eta kanpoko
zaurientzat ukendu goxo bat behar
dutenona. Oro har, gutxi-asko, laztanak
josten dituztenonak. Etxerako bidea
topatzeko lanak dituztenona. Bizipoza
eskutik eskura konpartitzeko kolkoa bete
dutenona. Gurera iristeko itsasoak eta
lurrak, herrimin, tristurak eta beldurrak
gainditu dituztenona. Eta ez gazteona, be
bai, jakina.
Errespetuzko harremanean,
neska baten ezetzaren
aurrean
ezetz hori urratzen
ez dutenona.
Martetarrona, dudik pe! Burusoilona,
ahaztu gabe. Ahaztu gabe ere, hegoak
ebakita, urrutiko kaioletan preso dauden
txorienona, gaixotasunak eta minak
jota jota dantzatzerik ez dutenona,
prekarietatearen karietara kaleaz beste
ondasunik ez duenona. Ui! Eta Alfa
Zentaurotarronak ere bai, zergatik ez?
Elkar entzun,
elkar ulertu,
elkar bizitzeko
borondatea dutenona.
Danborrerona, danborrero ona izan edo
ez galdetu gabe. Txalaparta elektrikoaren
soinuaz, hego eta ero haizeak jota, Agur
Jauna suelto-suelto dantzatzen dutenona.
Agur Jauna eta sardanak, reagge, rumba,
muñeira eta txipiritona. Bum! Bum! Bum!
heavy metaleko kontzertuan edota
Pi! Pi! Pi! kotxe pilaketa batean dantza
egiteko gauza direnona. Horien aurrean
belaunikatu egiten naiz, hiru aldiz
belaunikatu bertute horren aurrean.
Hitz batean, lasartoriatar guztiona, nabari
denez. Eta, esan gabe badoa ere esanda
geratzeko, baita lasartoriatarrak izan gabe
festetan bisitari ditugun guzti-guztionak
ere. Txispun!!
