Albisteak
Akordioa Lanbidek Afektatutakoen Plataformarekin
2016-03-01 | iruzkinak: 0 | Lasarte-Oriako udala
Jesus Zaballos alkateak Lanbidek Afektatutakoen Plataformarekin elkarlanean aritzeko akordioa aurkeztu du, plataformaren aholkularitzako lana babesteko xedez eta arazo horrek afaktatutako lasarteoriatarrei laguntzeko asmoz.
Vicky Molina eta Josean González plataformako ordezkariak eta Lourdes Acevedo zerbitzu sozialetako zinegotzia lagun zituela, Zaballosek atenditu nahi den arazoa azaldu du eta akordioaren nondik norakoak aletu ditu.
LAPek eta Udalak, akordio honen bitartez, sostengua eman nahi diete Lanbidek DBEaren jasotzaileei behargabeko ordainketak itzularazteko irekitako espedienteek afektatutakoei, itzuli behar horrek berekin baitakar familia horiek bizitza duina eraman ahal izateko funtsezkoak zaizkien laguntzak galtzea. Helburuak dira laguntzaren kentzea prebenitzea, itzuli beharreko kuota negoziatzea eta, laguntza kenduz gero, hura berraktibatzen laguntzea, udaleko teknikariak azpimarratu zuenez.
Zaballosek argi utzi nahi izan zuen gertaturikoaren erantzukizuna Lanbiderena baizik ez dela, hark kudeaketako akatsengatik pagamendu batzuk egin baititu, orain behargabekoak direnak eta jasotzaileei sorpresaz erreklamatzen dizkienak. Acevedok larritzat jotzen du pertsona horiek laguntzak kentzearen informazioa aldez aurretik oinarrizko zerbitzuei ez jakinaraztea, pertsona eta familia asko desanparaturik eta egoera ahulean utziz.
LAPeko ordezkariek eskerrak eman zizkioten Udalari bere babesagatik, horretan aitzindariak izan baitira, eta erreklamatu zuten ez dadila azkena izan eta udal gehiagok bat egin dezatela, kalkulatzen baita Euskadi osoan 80.000 familia daudela afektatuak. Nabarmendu zuten giza duintasunaren aldeko lan bat dela. Egiaztatu denez, aholkularitza teknikoa dagoenean, behargabeko pagamenduengatik erreklamatutako zorrak nabarmenki murrizten dira.
Udala LAPen jarduera promozionatzeko interesatua dago, DBEaren eta EPOaren jasotzaileen eskubide ekonomikoen defentsaren alde egiten duen heinean. Alkateak eskerrak eman zizkion kolektiboari, pertsona desabantailatuenen alde egin duen ahaleginagatik.
Akordioak, Euskadin aurkezten den lehena eta hitzarmenaren forma izango duenak, hau inplikatzen du:
-
Udaleko zerbitzu sozialek LAPen zerbitzu juridikoetara deribatu ahalko dituzte DBEaren prestazioengatik edota bestelako laguntza sozialengatik arazoren bat duten edo izan duten pertsonak, baldin eta horrek beren eskubide ekonomikoak galtzea badakarkie.
-
LAPeko zerbitzuek lehentasunez atendituko dituzte udaleko zerbitzu munizipalek igorritako pertsonak, eta banan-banako asistentzia ematen ahaleginduko dira.
-
Udalak jarduteko protokolo bat idatziko du, afektatuarenganako atentzioa bideratzeko. Ahal duen neurrian, gune bat egokituko dio udalaren beraren bulegoetan, lehenbiziko asistentzia egiteko.
-
LAPek afektatu bakoitzaren egoerari buruzko txostena helaraziko dio Udalari, Udaleko zerbitzu sozialei haren eskubide ekonomikoei buruzko informazioa emateko eta, hartara, errazagoa izan dadin kasu bakoitzean beharrezkotzat jotzen dituen neurriak hartzea.
-
Lasarte-Oriako Udalak 3000 euroko diru-laguntza emango dio 2016. urtean, LAPen funtzionamenduko gastuak ordaintzen laguntzeko.
LAP herritar-elkarte bat da, Gipuzkoan sare sozialen bitartez antolatu zena, Lanbidek iruzurraren kontrako ustezko operazio baten esparruan 2014. urtean egindako lehenbiziko bidalketa masiboen aurkako erreakzio espontaneo gisa. Errealitateak frogatu duenez, irekitako milaka espediente horiek ez dagozkie iruzurrezko jarduerei, baizik eta administrazioak egindako pagamendu behargabekoen ondoriozko doiketak besterik ez dira. Arartekoaren bulegoak ehundaka kexa atenditu ditu kausa horiengatik, eta Lanbideri zuzendutako gomendioak eman ditu, praktika administratibo txarrak ekidin ditzan.
Esperientzia laburra badu ere, LAPek bere salaketa-jarduerarekin lortu du agenda politikoan ipintzea Lanbideren praktika administratibo txarrek milaka familiarengan eragiten dituzten arazo ekonomiko larriak, krisiak langabezian eta lan-prekarietatean murgildu dituen familiak baitira.
Salaketa-lan horren lehen fruitua da Eusko Legebiltzarrak aho batez onetsi zuela ekainaren 6ko 72/2015 lege-proposamena, zeinaren bidez Eusko Jaurlaritzari eskatzen baitzaio prozedura egokiak inplementa ditzala, Lanbideren kudeaketa-akatsen ondorioak minimizatzera bideratuak, horien artean garrantzizkoena delarik 30 euroko kuota sozial bat ezartzea, Lanbidek egindako behargabeko pagamenduen itzulerak errazteko.
Familia afektatuek bizimodua ateratzen badute, osorik edo partez, DBEaren eta EPOaren prestazioak jasotzeko eskubidearen titular direlako da. Beraz, beren hileroko diru-sarreretan egiten zaien edozein gutxitzek esklusio sozialaren arriskuan ipintzen ditu. Alde horretatik, LAPek asistentzia juridikoa ematen die, dohainik eman ere, eskatzen dioten pertsona guztiei (batik bat Gipuzkoako biztanleei, baina beste lurralde historikoetako pertsonak ere urgatzi ditu telefonoz), eta laguntza horri esker hainbat bider eragotzi da afektatuen eskubide ekonomikoak urraturik geratzea.
LAPek pertsona afektatuari bi esparrutan ematen dio zerbitzua:
-
Alderdi juridikoan, banan-banan estudiatzen da kasu bakoitza, eta dagozkion alegazioak eta/edo errekurtsoa prestatzen dira. Administrazioarekiko auzien bidera jo beharra egokitzen bada, pertsonari doako justiziaren tramitazioan laguntzen zaio, ofiziozko abokatua eslei diezaioten, eta prozesuaren amaierara arte urgazten zaio.
-
Alderdi pertsonalean, afektatua modu indibidualizatuan atenditzen dute, babes eta sostengu emozionala ematen diote, beste afektatu batzuekin harremanetan jartzen dute eta elkartearen jardueretan parte hartzera gonbidatzen dute.
Udaleko Zerbitzu Sozialak 2014az geroztik ari dira erantzuten Diru-sarrerak Bermatzeko Errentaren prestazioak jasotzen dituzten pertsonen laguntza-eskaerak, Lanbidek jatorri ezezagunekoak zaizkien kopuruak erreklamatzen dizkielako edota DBEa edo EPOa jasotzeko duten eskubidea ezabatu edo iraungi zaielako, gertaera horiek babesgabetasun ekonomikoko egoeran uzten baititu pertsona horiek eta beren bizikide-unitateak.
